गत २० अक्टोवरको दिन सेरिया ब्रुनाईमा दुई म्युजिक भिडियोको सार्वजनिक कार्यक्रम सम्पन्न भयो ।

जगदिश समालको स्वर तथा नायिका गौरी मल्लको शब्द रहेको लजालु मेरी माया बोलको गीत साथै रिमा गुरुङको स्वर र विश्वकाजी राईको शब्द रहेको सयौ चोटि वोलको गीतको भिडियो निर्माण भएको हो । युवा निर्देशक मिलन चाम्सद्धारा निर्देशित दुवै गीतको छाँयाङ्कन वेलायत र ब्रुनाईमा भएको छ ।

सार्वजनिक कार्यक्रममा भेला भएका दर्शकहरुलाई नेपालबाट फोन मार्फत भिडियोका मोडल तथा नायक धिरेन शाक्य र गायक समालले प्रत्येक्ष सम्बोधन गरेका थिए ।

कार्यक्रमका प्रमुख अतिथि ब्रिटिस गोर्खा सेनाका गोर्खा मेजर याम बहादुर रानाले भिडियोको विमोचन गर्नुहुदै लाहूरे स्रष्टाहरुको संलग्नता र सिर्जना प्रति खुसि ब्यक्त गर्नुभयो । वहाले भिडियो सफलताको शुभकामना पनि ब्यक्त गर्नुभयो ।

कार्यक्रमको दोस्रो चरणमा चर्चित फिल्म “पश्चाताप” को प्रर्दशन भएको थियो । वेलायतमा रहेका नेपालीहरु कसरी बिग्रिएका छन् भन्ने सन्देश बोकेको फिल्म हेरेपछि दर्शकहरुको आँखा रसाएका थिए । फिल्मका निर्माता जितेन्द्र चेम्जोङका अनुसार अब छिट्टै मलेसियाका विभिन्न क्षेत्रमा पश्चाताप को प्रर्दशन गरिने भएको छ।